ເພື່ອປະກອບເປັນສ່ວນເຂົ້າໃນການຮັກສາສຸຂພາບຂອງປະຊາຊົນທ້ອງຖີ່ນແລະບັນດານັກທ່ອງທ່ຽວພ້ອມທັງເປັນການສົ່ງເສີມບັນຍາກາດໃນເມືອງມໍຣະດົກໂລກໃຫ້ດີຂື້ນ ທາງການເມືອງຫລວງພຣະບາງຈື່ງໄດ້ປະກາດຫວ່າງບໍ່ເທົ່າໃດເດືອນຜ່ານມານີ້ເພື່ອຫ້າມບໍ່ໃຫ້ສູບຢາຢູ່ຕາມພື້ນທີ່ຂອງທາງການ ແລະຕາມສະຖານທີ່ສຳຄັນຕ່າງໆ. ເທົ່າປັຈຈຸບັນນີ້ປາກົດວ່າໄດ້ຮັບຜົລຕອບທີ່ຂ້ອນຂ້າງໜ້າເພີ່ງພໍໃຈ ດັ່ງທີ່ທ່ານ ໄຊຍະສັກ ແກ້ວປັນຍາ ເຈົ້າເມືອງໆຫລວງພຣະບາງໄດ້ຊີ້ແຈງວ່າ:
ສຽງ: “ພວກເຮົາເຮັດກັນພຽງເບື້ອງຕົ້ນໃນການປູກຈີຕສຳນຶກໃຫ້ທາງພໍ່ແມ່ປະຊາຊົນ ກໍຄືນັກທ່ອງທ່ຽວ ຄວາມຮ່ວມມືຈາກເຂົາເຈົ້າກໍສນັບສນູນນັ້ນແລ້ວ ແຕ່ຫາກຜູ້ໃດບໍ່ປະຕິບັຕ ຫາກສູບຢູ່ໃນສະຖານທີ່ດັ່ງກ່າວ ພວກເຮົາກໍມີການສຶກສາອົບຮົມ ບໍ່ທັນຈະເຖີງຂັ້ນມີການປັບໃໝດອກ"
ແຜນການງົດສູບຢາດັ່ງກ່າວ ທາງການເມືອງຫລວງພຣະບາງໄດ້ເຣີ່ມປະຕິ ບັຕຢ່າງແທ້ຈີງແຕ່ມື້ສລອງການງົດສູບຢາສາກົລ ຊື່ງຈັດຂື້ນໃນທ້າຍ ເດືອນພຶສພາ ຜ່ານມາ ແລະສະເພາະສະຖານທີ່ໆມີການຫ້າມສູບຢາຢ່າງເດັດຂາດແທ້ໆນັ້ນແມ່ນບໍຣິເວນວັດຊຽງທອງ ສະຖານທີ່ຫ້ອງການແຂວງ ແລະໂຮງພຍາບາທ ຊື່ງໃນຣະຍະຜ່ານມາທາງການ ກ່ຽວຂ້ອງກໍໄດ້ປະຊາສັມພັນແລະໂຄສະນາໃຫ້ຊາວເມືອງຫລວງພຣະບາງແລະນັກທ່ອງທ່ຽວໃຫ້ເຂົ້າໃຈ ຊື່ງຕ່າງຄົນກໍໃຫ້ຄວາມຮ່ວມມືເປັນຢ່າງດີ. ທ່ານໄຊຍະສັກ ໄດ້ໃຫ້ການຊີ້ແຈງເພີ່ມວ່າ:
ສຽງ: “ແນ່ນອນໃນຂັ້ນຕໍ່ໄປ ຕົວນີ້ຈະໄດ້ເຣັດໃນທົ່ວເທສບາລແຕ່ກໍຕ້ອງຈັດສັນບ່ອນສະຖານທີ່ສູບຢາໃຫ້ບາງຈຸດ ກະຊວງສາທາຣະນະສຸຂ ກໍຄືຫ້ອງວ່າການແຂວງ ເພີ່ນເປັນຜູ້ໄດ້ປະສານງານ ແລະສົມທົບກັບບັນດາທ່ອງທ່ຽວຕ່າງໆ ຕ້ອງໄດ້ເຜີຽແພ່ໃຫ້ແກ່ນັກທ່ອງທ່ຽວຮູ້ "
ເຖີງຢ່າງໃດກໍຕາມສາເຫຕສຳຄັນຂອງການສູບຢາໂດຽສະເພາະໃນກຸ່ມເຍົາວະ ຊົນວັຍໜຸ່ມນັ້ນ ຄົງແມ່ນເພື່ອຢາກຮູ້ເປັນການທົດລອງເປັນສ່ວນໃຫຍ່ ໂດຽທີ່ບໍ່ຮູ້ເຖີງຜົລກະທົບທີ່ຈະຕາມມາພາຍຫລັງ ຊື່ງອາຈຮວມໄປເຖີງການເສັຽ ຊີວີຕຍ້ອນໂຣຄມະເຮງໃນປອດແລະໂຣຄທີ່ກ່ຽວພັນໃນເສັ້ນເລືອດຫົວໃຈກໍເປັນໄດ້!!
ຫວາດ ສີມູນ ຣາຍງານ
