Luang Prabang Today

ປະກາດສັງຂານ ປະຕິທິນ​ລາວ ​ແຫ່ງ​ປີ ພ​.ສ 2553

ວັນສັງຂານລ່ວງ: ວັນພຸດ ຂຶ້ນ 1 ຄໍ່າ ເດືອນ 6 ຈຸນລະສັກກະຣາດ 1371,ພຸດທະສັກກະຣາດ 2552 ກົງກັບວັນທາງສຸລິຍະຄະຕິ ວັນທີ 14 ເດືອນເມສາ ປີ ຄິດຕະສັກກະຣາດ 2010.

ວັນສັງຂານເນົາ: ວັນພະຫັດ ຂຶ້ນ 2 ຄ່ຳ ເດືອນ 6 ຈຸນລະສັກກະຣາດ 1371,ພຸດທະສັກກະຣາດ 2552 ກົງກັບວັນທາງສຸລິຍະຄະຕິ, ວັນທີ 15 ເດືອນ ເມສາ ປີຄິດຕະສັກກະຣາດ 2010 (ເນົາວັນດຽວ).

ວັນສັງຂານຂຶ້ນ: ວັນສຸກ ຂຶ້ນ 3 ຄ່ຳ ເດືອນ 6 ກົງກັບວັນທາງສຸລິຍະຄະຕິ, ວັນທີ 16 ເດືອນເມສາ ປີ ຄິດທະສັກກະຣາດ 2010 ເປັນມື້ຖະເຫຼີງສົກຂຶ້ນປີໃໝ່ລາວ, ແລະ​ປ່ຽນ ຈ​.ສ 1371, ພ​.ສ 2552 ມາ​ເປັນ ຈ​.ສ 1372 ​ແລະ ພ.ສ 2553 ຕາມ​ລຳດັບ, ເຊິ່ງຈະໄປສິ້ນສຸດໃນ ວັນສຸກ ​ຂຶ້ນ 13 ຄໍ່າ ເດືອນ 5 ເຊິ່ງເປັນ ມື້ສັງຂານເນົາແຫ່ງປີ ຈຸນລະສັກກະຣາດ 1371 ພຸດທະສັກກະຣາດ 2553 ກົງກັບ ວັນທີ 15 ເດືອນເມສາ ປີຄິດທະສັກກະຣາດ 2011.

ນາງສັງຂານ: ນາງສັງຂານປະຈຳວັນພຸດ, ນາງເທບທິດາ ອົງທີ 4 ຊົງພະນາມວ່າ “ ມົນທາເທວີ ” ຊົງພະຫຸຣັດທັດດອກຈໍາປາ ອາພອນປະດັບລ້ວນ ໄປດ້ວຍແກ້ວ ໄພທູນ (ແກ້ວສີຂຽວໃບໄມ້) ພັກສາຫານ ນົມເນີຍ ເປັນອາຫານ ພະຫັດຂວາຊົງຖື ຫຼາວ (ເຫຼັກແຫຼມ) ພະຫັດຊ້າຍ ຊົງຖື ໄມ້ເທົ້າ ສະເດັດໄສຍາດ ມາເໜືອຫຼັງ ຄັດທະຣະພະ (ມ້າລໍ) ເປັນພາຫະນະ.

ເກນພິລຸນນະສາດ: ພະອັງຄານເປັນອະທິບໍດີ ນາກຫຼີ້ນນໍ້າ ສູນຕົວ ບັນດານໃຫ້ຝົນຕົກ 300 ຫ່າ: ຕົກໃນຂອບເຂດຈັກກະວານ 120 ຫ່າ, ຕົກໃນປ່າຫິມະພານ 90 ຫ່າ ຕົກໃນມະຫາ ສະໝຸດ 60 ຫ່າ ແລະ ຕົກໃນມະນຸດສະໂລກ 30 ຫ່າ.

ເກນທາລາທິຄຸນ: ຕົກລາສີ ເຕໂຊ ນ້ຳຈະມີຫນ້ອຍ, ຈະມີລົມພັດມາບາງຄັ້ງຄາວ ຈາກທຸກສາລະທິດ.

ເກນທັນຍາຫານ: ຖືກຊື່ວ່າ ວິບັດ ເຂົ້າກ້າໄຮ່ນາ ຈະມີດ້ວງມີແມງກິນ ຈະໄດ້ຮັບຜົນພຽງ ແຕ່ 1 ສ່ວນ, ເສຍ 1 ສ່ວນ, ຫມາກ​ໄມ້ບໍ່ຄ່ອຍ​ຈ​ມີ​ດ້ວງມີ​ແມງປານໃດ, ສ່ວນນາລຸ່ມ ຈະໄດ້ຮັບຜົນດີກວ່ານາດອນ.

ເກນກາລະໂຍກ: ວັນອັງຄານ ເປັນທຸງໄຊ, ວັນພະຫັດ ເປັນອາທິບໍດີ, ວັນພະຫັດ ເປັນອຸບາດ ແລະ ວັນເສົາ ເປັນໂລກາວິນາດ.

ຜົນການຄຳນວນ

ຫໍລະຄຸນ ອັດຕາ: 501136, ກໍາມັດຊະພົນ ອັດຕາ: 423, ອະວະມານ ອັດຕາ: 674 ມາດສະເກນ ອັດຕາ: 16970, ອຸດຈະພົນ ອັດຕາ: 2787, ດິຖີ: 2, ວາລະ: 6.

ການຄຳນວນທັງໝົດແມ່ນອີງຕາມຕຳລາ “ ໂຫລາສາດລາວ ພາກປັກຂະທິນ ໂດຍ ເຈົ້າ ເພັດຊະລາດ ລັດຕະນະວົງສາ ” ການຄຳນວນດັ່ງກ່າວແມ່ນ ໃຊ້ໂປຣແກຣມຊ່ວຍ, ຜົນ​ການ ຄຳນວນ​ທາງ​ຄະນິດສາ​ດ ຈິ່ງມີຄວາມແນ່ນອນສູງ.